رداً على مقال :

الحكومة بتسألك .. نفسك في ايه؟؟

احم .. احم

حكومتي المبجلة .... أشكرك شكراً جزيلاً لإتاحة الفرصة لي حتى أحلم واتمنى ما أتمناه .. وبما أن عليّ فقط أن أحلم وعليكم التنفيذ .. فإن حلمي سيطول قليلاً....

حكومتي ...

أولا ..

  أتمنى أن تتكرموا بمراجعة المناهج التعليمية من جديد أو لو تفضلتم   وراجعتم النظام التعليمي ككل لأنه - معذرة - نظام فاشل (انتوا اللي طلبتوا  اني اتكلم ماليش دعوة)

ثانيا ..

  أرجو من حضراتكم أن تتفضلوا مشكورين وتزيدوا رواتب معلمينا الأفاضل قلييييييييييييلا وذلك حتى يكون في مقدورهم ان يعيشوا (زي مخاليق ربنا) ومعلش احنا بنتكلم

ثالثا ..

  أرجو من سيادتكم إعادة النظر في نظامكم الصحي (اللي مش صحي خالص) وارحمونا بقى كفاية اللي احنا فيه

رابعا ..

  بقول ايه ما تشوفوا حل في المياه اللي مغرقانا دي .. ولا يلا آدي الساحل الشمالي جالنا لحد عندنا حد قدنا؟؟!!

خامسا ..

  ماهو مش كل شوية تقطعولنا الكهربة وتعيشونا في الجو الكئيب ده .. ولو كنتوا بتعملوا كده علشان تحسسونا بقيمة توماس اديسون فاحنا بنقول لكم : خلاااااااااااااااااص والله العظيم عرفنا وحسينا حتى هاتوا الراجل دلوقتي واحنا نضربله تعظيم سلام ونبوس راسه.......

 (اه صحيح كنت سمعت كده انكوا بتصدروا الكهربة ألا صحيح الكلام ده؟؟ .. ايييييييييه .. خلااااص خلاص .. حقكوا عليا .. انا مقلتش حاجة .. انا بقول بيقووووووولواااااااااااااا مش انا اللي بقول .. لا بجد هو حقيقي الكلام ده؟؟ .. خلاااااااااااااااااااااااااااااااااص مش عايزة اعرف .. يا ساتر يا رب)

سادسا ..

  بصوا بقى عندكوا بطالة وازمة مرور وامية وامراض مش لاقين لها علاج واطفال شوارع ومشكلة سكانية و ... ولا كفاية كده .. بقى بالصلاة ع النبي كده عايزين حل لكووووووووووول المشكلات دي .. اه هو احنا يعني هنفضل ساكتين لحد امتى؟؟

سابعا ..

  انا بقول تقدموا استقالتكوا وتشوفولكوا شغلانة تانية احسن .. ايوة ماهو مدام محستوهاش لوحدكوا يبقى احنا هنقولها لكم .. بصوا يا اسيادنا .. احنا بقى زهقنا منكوا وخلاص معدناش طايقينكوا .. ايوة خلااااااااااااااااااص مش قادرين نستحمل اكتر من كده

انتوا بالصلاة ع النبي كده تمشوا من سكات بدل .. بدل ما ندعي عليكوا .. اه هندعي عليكوا .. بس هه

ومعلش احنا بنتكلم!!!!!!!!!!!!!!!!!!!!!!!

إمضاء .. مواطنة مخنوقة