كتبت جنة :
علشان جنابك يا بيك ( سلسلة من أجلك انت )
من أجلك أنت....
الشعب فقير غلبان طالع عينه
قرفان زهقان ولاحدش سائل فيه
شايل هموم وهموم فوق كتفه
ومحدش عاجبه وطايحين فيه
لا حد يساعده ولا يعينه
والغلب كتير من حواليه
وهو يا عيني مسلِّم وراضي
وبيبوس في ايدين البيه
ويقول له انا خدامك يا باشا
ويوطي يبوس رجليه
وكل ده ومش عاجب
ومحدش بيفكر يراضيه
سايبينه في مشاكله غرقان
وعايش لا بيه ولا عليه
ملوش دعوة بأي حاجة
ما هو نفسه يربي عيِّليه
وياريتهم سايبينه في حاله
لأ دول يقبضوا عليه
يا باشا أنا نفسي أفهم
هو انا يعني عملت إيه؟
دا انا عايش والله في حالي
حتى حقي مش بطالب بيه
أنا بس عايز اربي عيالي
بعرقي وتعبي أوصل للجنيه
أشوف الواد بيكبر قدامي
غلطان انا بقى ولا إيه؟
ولا ده كمان حرام
وسيادتك مش سامحلي بيه؟؟
يا ناس حرام عليكوا
حسوا بيا وباللي انا فيه
قدروا تعبي وشقايا
شوفوا اللي بتعملوه معايا
وانا صابر وساكت ورافع راية
وبعد ده كله عايزين مني إيه؟
قلتوا امشي جنب الحيط
مشيت ووافقت ورضيت
قلتوا متقراش جرايد .. ومن وقتها ما قريت
قلتوا خليك في حالك .. خليتني قاعد في البيت
مليش شغلة تشغلني .. غير بيتي والغيط
أبقى انا غلطان؟ .. ما تقول لي يا بيه
سقيتونا المر يا عالم
روحوا ربنا ع الظالم
والمفتري وابن الإيه
يارب خدلي حقي
من المفتري والحلنجي
من الباشا وابنه البيه
يارب نفسي اعيش
آكل لقمتين عيش
ابني يروح الجيش
بس أبقى مطمِّن عليه
يا عالم ده حقي
بخلانين عليَّا بيه؟
وكل اللي بيحصل فيا
بيحصل كله ليه؟؟
ما هو علشانك ياريس
علشان جنابك يا بيه
علشان جنابك يا
بيه
بقلــــــــــــــــم
جنـــــــــــــــــــــــــــــــة
اقرأ أيضاً في هذه السلسلة:
من أجلك أنت
عالم طوابير طوابير
| 
